1. 10. 1
Nakhasikhāsuttaṃ

214. [PTS Page 133] [\q 133/] du 133 [para missing] evaṃ me sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho bhagavā parittaṃ nakhasikhāyaṃ paṃsuṃ āropetvā bhikkhū āmantesi: taṅkimmaññatha bhikkhave, katamannu kho bahutaraṃ yo vāyaṃ mayā1 paritto nakhasikhāyaṃ paṃsu āropito, ayaṃ vā mahāpaṭhavī'ti?

Etadeva bhante, bahutaraṃ yadidaṃ mahāpaṭhavi, appamattako nakhasikhāyaṃ bhagavatā paritto paṃsu āropito neva satimaṃ kalaṃ upeti, na sahassimaṃ kalaṃ upeti, na satasahassimaṃ kalaṃ upeti, mahāpaṭhaviṃ upanidhāya bhagavatā paritto nakhasikhāya paṃsu āropito'ti.
Evameva kho bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ, appamattakaṃ avasiṭṭhaṃ. Neva satimaṃ kalaṃ upeti, na sahassimaṃ [PTS Page 134] [\q 134/] kalaṃ upeti, na satasahassimaṃ kalaṃ upeti, purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattūṃ paramatā.2

Evaṃ mahatthiyo kho bhikkhave, dhammābhisamayo, evaṃ mahatthiyo3 dhammacakkhupaṭilābho'ti.

1. 10. 2.
Pokkharaṇisuttaṃ

215. Sāvatthiyaṃ-

Seyyathāpi bhikkhave, pokkharaṇī paññāsayojanāni āyāmena paññāsayojanāni vitthārena paññasayojanāni ubbedhena puṇṇā udakassa samatittikā kākapeyyā. Tato puriso kusaggena udakaṃ uddhareyya, taṃ kimmaññatha bhikkhave katamannūkho bahutaraṃ yaṃ vā kusaggena udakaṃ ubbhataṃ, yaṃ vā pokkharaṇiyā udakanti?

Etadeva bhante, bahutaraṃ yadidaṃ pokkharaṇiyā udakaṃ. Appamattaṃ kusaggena udakaṃ ubbhataṃ. Neva sati maṃ kalaṃ upeti, na sahassimaṃ kalaṃ upeti, na satasahassimaṃ kalaṃ upeti, pokkharaṇiyā udakaṃ upanidhāya kusaggena udakaṃ ubbhatanti.

------------------
1. Yovāyaṃ-sīmu, [pts,] syā. 2. Sattakkhattuparamatā-syā. 3. Mahiddhiyo-sīmu.

[BJT Page 214] [\x 214/]

Evameva kho bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ, appamattakaṃ avasiṭṭhaṃ. Neva satimaṃ kalaṃ upeti, na sahassimaṃ [PTS Page 134] [\q 134/] kalaṃ upeti, na satasahassimaṃ kalaṃ upeti, purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattūṃ paramatā.

Evaṃ mahatthiyo kho bhikkhave dhammābhisamayo, evaṃ mahatthiyo dhammacakkhupaṭilābho'ti.

1. 10. 3
Samhejjaudakasuttaṃ

216. Sāvatthiyaṃ-

[PTS Page 135] [\q 135/] seyyathāpi bhikkhave, yatthimā mahānadiyo saṃsandanti samenti, seyyathīdaṃ: gaṅgā yamunā aciravatī sarabhū mahī. Tato puriso dve vā tīṇi vā udakaphusitāni uddhareyya. Taṃ kimmaññatha bhikkhave, katamannu kho bahutaraṃ yāni vā dve vā tīṇi vā udakaphusitāni ubbhatāni, yaṃ vā samhejja udakanti?

Etadeva bhante, bahutaraṃ yadidaṃ samhejja udakaṃ. Appamattakāni dve vā tīṇi vā udakaphusitāni ubbhatāni. Neva satimaṃ kalaṃ upenti, na sahassimaṃ kalaṃ upenti, na satasahassimaṃ kalaṃ upenti, samhejja udakaṃ upanidhāya dve vā tīṇi vā udakaphusitāni ubbhatānīti.

Evameva kho bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ, appamattakaṃ avasiṭṭhaṃ. Neva satimaṃ kalaṃ upeti, na sahassimaṃ kalaṃ upeti, na satasahassimaṃ kalaṃ upeti, purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattūṃ paramatā.

Evaṃ mahatthiyo kho bhikkhave dhammābhisamayo, evaṃ mahatthiyo dhammacakkhupaṭilābho'ti.

1. 10. 4.
Dutiya sambhejjaudakasuttaṃ

217. Sāvatthiyaṃ-

Seyyathāpi bhikkhave, yatthimā mahānadiyo saṃsandanti samenti, seyyathīdaṃ: gaṅgā yamunā aciravatī sarabhū mahī. Taṃ udakaṃ parikkhayaṃ pariyādānaṃ gaccheyya ṭhapetvā dve vā tīṇivā udakaphusitāni. Taṃ kimmaññatha bhikkhave, katamannū kho bahutaraṃ yaṃ vā samhejja udakaṃ parikkhīṇaṃ pariyādinnaṃ. Yāni vā dve vā tīṇi vā udakaphusikāni avasiṭṭhānī'ti?
Etadeva bhante, bahutaraṃ sambhejja udakaṃ yadidaṃ parikkhīṇaṃ pariyādinnaṃ. Appamattakāni dve vā tīṇi vā udakaphusitāni avasiṭṭhāni. Neva satimaṃ kalaṃ upenti, na sahassimaṃ kalaṃ upenti, na satasahassimaṃ kalaṃ upenti, sambhejja udakaṃ parikkhīṇaṃ pariyādinnaṃ upanidhāya dve vā tīṇi vā udakaphusitāni avasiṭṭhānī'ti.

Evameva kho bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ, appamattakaṃ avasiṭṭhaṃ. Neva satimaṃ kalaṃ upeti, na sahassimaṃ kalaṃ upeti, na satasahassimaṃ kalaṃ upeti, purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattūṃ paramatā.

Evaṃ mahatthiyo kho bhikkhave, dhammābhisamayo, evaṃ mahatthiyo dhammacakkhupaṭilābho'ti.

[BJT Page 216] [\x 216/]

1. 10. 5.
Paṭhavisuttaṃ

218. Sāvatthiyaṃ-

[PTS Page 136] [\q 136/] seyyathāpi bhikkhave, puriso mahāpaṭhaviyā sattakolaṭṭhimattiyo guḷikā upanikkhipeyya. Taṃ kimmaññatha bhikkhave, katamaṃ nu kho bahutaraṃ yā vā sattakolaṭṭhimattiyo guḷikā upanikkhittā. Yā vā mahāpaṭhavī'ti?

Etadeva bhante, bahutaraṃ yadidaṃ mahāpaṭhavi. Appamattikā sattakolaṭṭhimattiyo guḷikā upanikkhittā. Neva satiyaṃ kalaṃ upenti, na sahassimaṃ kalaṃ upenti, na satasahassimaṃ kalaṃ upenti, mahāpaṭhaviṃ upanidhāya sattakolaṭṭhimattiyo guḷikā upanikkhittā'ti.
Evameva kho bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ, appamattakaṃ avasiṭṭhaṃ. Neva satimaṃ kalaṃ upeti, na sahassimaṃ kalaṃ upeti, na satasahassimaṃ kalaṃ upeti, purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattūṃ paramatā.

Evaṃ mahatthiyo kho bhikkhave dhammābhisamayo, evaṃ mahatthiyo dhammacakkhupaṭilābho'ti.

1. 10. 6
Dutiyapaṭhavisuttaṃ

219. Sāvatthiyaṃ-

Seyyathāpi bhikkhave, mahāpaṭhavi parikkhayaṃ pariyādānaṃ gaccheyya ṭhapetvā sattakolaṭṭhimattiyo guḷikā. Taṃ kimmaññatha bhikkhave, katamannu kho bahutaraṃ yaṃ vā mahāpaṭhaviyā parikkhīṇaṃ pariyādinnaṃ, yā vā sattakolaṭṭhimattiyo guḷikā avasiṭṭhā'ti?

Etadeva bhante, bahutaraṃ mahāpaṭhaviyā yadidaṃ parikkhīṇaṃ pariyādinnaṃ. Appamattikā sattakolaṭṭhimattiyo guḷikā avasiṭṭhā. Neva satimaṃ kalaṃ upenti, na sahassimaṃ kalaṃ upenti, na satasahassimaṃ kalaṃ upenti, mahāpaṭhaviyā parikkhīṇaṃ pariyādinnaṃ upanidhāya sattakolaṭṭhimattiyo guḷikā avasiṭṭhā'ti.

Evameva kho bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ, appamattakaṃ avasiṭṭhaṃ. Neva satimaṃ kalaṃ upeti, na sahassimaṃ kalaṃ upeti, na satasahassimaṃ kalaṃ upeti, purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattūṃ paramatā.

Evaṃ mahatthiyo kho bhikkhave dhammābhisamayo, evaṃ mahatthiyo dhammacakkhupaṭilābho'ti.

1. 10. 7
Samuddasuttaṃ

220. Sāvatthiyaṃ-

Seyyathāpi bhikkhave, puriso mahāsamuddato1 dve vā tīṇi vā udakaphusitāni uddhareyya, taṃ kimmaññatha bhikkhave, katamaṃ nu kho bahutaraṃ yāni vā dve vā tīṇi vā udakaphusitāni ubbhatāni, yaṃ vā mahāsamudde udakanti?

[PTS Page 137] [\q 137/] etadeva bhante, bahutaraṃ yadidaṃ mahāsamudde udakaṃ appamattāni dve vā tīṇi vā udakaphusitāni ubbhatāni. Neva satimaṃ kalaṃ upenti, na sahassimaṃ kalaṃ upenti, na satasahassimaṃ kalaṃ upenti. Mahāsamudde udakaṃ upanidhāya dve vā tīṇi vā udakaphusitāni ubbhatānī'ti.

Evameva kho bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ, appamattakaṃ avasiṭṭhaṃ. Neva satimaṃ kalaṃ upeti, na sahassimaṃ kalaṃ upeti, na satasahassimaṃ kalaṃ upeti, purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattūṃ paramatā.

Evaṃ mahatthiyo kho bhikkhave dhammābhisamayo, evaṃ mahatthiyo dhammacakkhupaṭilābho'ti.

---------------------
1. Mahāsamuddā - syā.

[BJT Page 218] [\x 218/]

1. 10. 8
Dutiya samuddasuttaṃ

221. Sāvatthiyaṃ-

Seyyathāpi bhikkhave, mahāsamuddo parikkhayaṃ pariyādānaṃ gaccheyya, ṭhapetvā dve vā tīṇi vā udakaphusitāni. Taṃ kimmaññatha bhikkhave, katamaṃ nu kho bahutaraṃ, yaṃ vā mahāsamudde udakaṃ parikkhīṇaṃ pariyādinnaṃ, yāni vā dve vā tīṇi vā udakaphusitāni avasiṭṭhānī'ti?

Etadeva bhante, bahutaraṃ mahāsamudde udakaṃ yadidaṃ parikkhīṇaṃ pariyādinnaṃ appamattāni dve vā tiṇi vā udakaphusitāni avasiṭṭhāni. Neva satimaṃ kalaṃ upenti, na sahassimaṃ kalaṃ upenti, na satasahassimaṃ kalaṃ upenti, mahāsamudde udakaṃ parikkhīṇaṃ pariyādinnaṃ upanidhāya dve vā tīṇi vā udakaphusitāni avasiṭṭhānī'ti.

Evameva kho bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ, appamattakaṃ avasiṭṭhaṃ. Neva satimaṃ kalaṃ upeti, na sahassimaṃ kalaṃ upeti, na satasahassimaṃ kalaṃ upeti, purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattūṃ paramatā.

Evaṃ mahatthiyo kho bhikkhave dhammābhisamayo, evaṃ mahatthiyo dhammacakkhupaṭilābho'ti.

1. 10. 9

Pabbatūpamasuttaṃ

222. Sāvatthiyaṃ-

Seyyathāpi bhikkhave, puriso himavato pabbatarājassa satta sāsapamattiyo pāsāṇasakkharā upanikkhipeyya taṃ kiṃmaññatha bhikkhave, katamannukho bahutaraṃ yā vā satta sāsapamattiyo pāsāṇasakkharā upanikkhittā, yo vā himavā pabbatarājā'ti.

Etadeva bhante, bahutaraṃ yadidaṃ himavā pabbatarājā. Appamattikā satta sāsapamattiyo pāsāṇasakkharā [PTS Page 138] [\q 138/] upanikkhittā. Neva satimaṃ kalaṃ upenti, na sahassimaṃ kalaṃ upenti, na satasahassimaṃ kalaṃ upenti, himavantaṃ pabbatarājaṃ upanidhāya satta sāsapamattiyo pāsāṇasakkharā upanikkhittā'ti.

Evameva kho bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ, appamattakaṃ avasiṭṭhaṃ. Neva satimaṃ kalaṃ upeti, na sahassimaṃ kalaṃ upeti, na satasahassimaṃ kalaṃ upeti, purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattūṃ paramatā.

Evaṃ mahatthiyo kho bhikkhave, dhammābhisamayo, evaṃ mahatthiyo dhammacakkhupaṭilābho'ti.

1. 10. 10
Dutiya pabbatūpamasuttaṃ

223. Sāvatthiyaṃ-

Seyyathāpi bhikkhave, himavā pabbatarājā parikkhayaṃ pariyādānaṃ gaccheyya ṭhapetvā satta sāsapamattiyo pāsāṇasakkharā. Taṃ kimmaññatha bhikkhave, katamannukho bahutaraṃ, yaṃ vā himavato pabbatarājassa parikkhīṇaṃ pariyādinnaṃ, yā vā satta sāsapamattiyo pāsāṇasakkharā avasiṭṭhā'ti?

[BJT Page 220] [\x 220/]

Etadeva bhante, bahutaraṃ himavato pabbatarājassa yadidaṃ parikkhīṇaṃ pariyādinnaṃ appamattikā satta sāsapamattiyo pāsāṇasakkharā avasiṭṭhā. Neva satimaṃ kalaṃ apenti na sahassimaṃ kalaṃ upenti, na satasahassimaṃ kalaṃ upenti, himavato pabbatarājassa parikkhīṇaṃ pariyādinnaṃ upanidhāya satta sāsapamattiyo pāsāṇasakkharā avasiṭṭhā'ti.

Evameva kho bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ, appamattakaṃ avasiṭṭhaṃ. Neva satimaṃ kalaṃ upeti, na sahassimaṃ kalaṃ upeti, na satasahassimaṃ kalaṃ upeti, purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattūṃ paramatā.

Evaṃ mahatthiyo kho bhikkhave dhammābhisamayo, evaṃ mahatthiyo dhammacakkhupaṭilābho'ti.

1. 10. 11
Tatiyapabbatūpamasuttaṃ

224. Sāvatthiyaṃ-

[PTS Page 139] [\q 139/] seyyathāpi bhikkhave, puriso sinerussa pabbatarājassa satta muggamattiyo pāsāṇasakkharā upanikkhipeyya. Taṃ kimmaññatha bhikkhave, katamaṃ nu kho bahutaraṃ yā vā satta muggamattiyo pāsāṇasakkharā upanikkhittā, yo vā sineru pabbatarājā'ti?
Etadeva bhante, bahutaraṃ yadidaṃ sineru pabbatarājā. Appamattikā satta muggamattiyo pāsāṇasakkharā upanikkhittā. Neva satimaṃ kalaṃ upenti, na sahassimaṃ kalaṃ upenti, na satasahassimaṃ kalaṃ upenti, sineruṃ pabbatarājānaṃ upanidhāya satta muggamattiyo pāsāṇasakkharā upanikkhittā'ti.

Evameva kho bhikkhave ariyasāvakassa diṭṭhisampannassa puggalassa adhigamaṃ upanidhāya aññatitthiyasamaṇabrāhmaṇaparibbājakānaṃ adhigamo. Neva satimaṃ kalaṃ upeti, na sahassimaṃ kalaṃ upeti, na satasahassimaṃ kalaṃ upeti. Evaṃ mahādhigamo bhikkhave, diṭṭhisampanno puggalo evaṃ mahābhiñño'ti.

Abhisamayavaggo dasamo.

Tatruddānaṃ:
Nakhasikhā pokkharaṇi ceva sambhejja udake duve,
Dve paṭhavī dve samuddā tayo ca pabbatūpamā'ti.

Abhisamayasaṃyuttaṃ samattaṃ.

Tatra vagguddānaṃ:

Buddho āhāro dasabalo kaḷāro gahapati pañcamo,
Dukkhavaggo mahāvaggo aṭṭhamo samaṇabrāhmaṇo,
Navamo'ntarapeyyālo dasamo'bhisamayo bhaveti

[BJT Page 222] [\x 222/]