Evaṃ me sutaṃ: ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho bhagavā pubbanhasamayaṃ nivāsetvā pattacīvaraṃ ādāya kapilavatthuṃ piṇḍāya pāvisi. Kapilavatthusmiṃ piṇḍāya caritvā pacchābhattaṃ piṇḍapātapaṭikkanto yena kāḷakhemakassa sakkassa vihāro, tenupasaṅkami divāvihārāya. Tena kho pana samayena kāḷakhemakassa vihāre sambahulāni senāsanāni paññattāni honti. Addasā kho bhagavā kāḷakhemakassa sakkassa vihāre sambahulāni [PTS Page 110] [\q 110/] senāsanāni paññattāni. Disvāna bhagavato etadahosi: sambahulāni kho kāḷakhemakassa sakkassa vihāre senāsanāni paññattāni sambahulā nu kho idha bhikkhu viharantīti.

Tena kho pana samayena āyasmā ānando sambahulehi bhikkhūhi saddhiṃ ghaṭāya sakkassa vihāre civarakammaṃ karoti. Atha kho bhagavā sāyanhasamayaṃ patisallānā vuṭṭhito, yena ghaṭāya sakkassa vihāro tenupasaṅkami, upasaṅkamitvā paññatte āsane nisidi. Nisajja kho bhagavā āyasmantaṃ ānandaṃ āmantesi: sambahulāni kho ānanda kāḷakhemakassa sakkassa vihāre senāsanāni paññattāni, samabahulā nu kho ettha bhikkhū viharantīti.

Sambahulāni bhante, kāḷakhemakassa sakkassa vihāre senāsanāni paññattāni, sambahulā ettha bhikkhū viharanti. Cīvarakārasamayo no bhante, vattatīti.

Na kho ānanda, bhikkhu sobhani saṅgaṇikārāmo saṅgaṇikārato saṅgaṇikārāmataṃ anuyutto gaṇārāmo gaṇarato gaṇasammudito. So vatānanda, bhikkhu saṅgaṇikārāmo saṅgaṇikārato saṅgaṇikārāmataṃ anuyutto gaṇārāmo gaṇarato gaṇasammudito. Yaṃ taṃ nekkhammasukhaṃ pavivekasukhaṃ upasamasukhaṃ sambodhasukhaṃ1 tassa sukhassa nikāmalābhī bhavissati akicchalābhī akasiralābhīti netaṃ ṭhānaṃ vijjati. Yo ca kho so ānanda, bhikkhu eko gaṇasmā vūpakaṭṭho viharati. Tassetaṃ bhikkhuno pāṭikaṅkhaṃ: yaṃ taṃ nekkhammasukhaṃ pavivekasukhaṃ upasamasukhaṃ sambodhasukhaṃ1 tassa sukhassa nikāmalābhī bhavissati akicchalābhī akasiralābhīti ṭhānametaṃ vijjati.

So vatānanda, bhikkhu saṅgaṇikārāmo saṅgaṇikārāmataṃ anuyutto gaṇārāmo gaṇarato gaṇasammudito sāmayikaṃ2 vā kantaṃ cetovimuttiṃ upasampajja viharissati, asāmayikaṃ2 vā akuppanti netaṃ ṭhānaṃ vijjati. Yo ca kho so ānanda, bhikkhu eko gaṇasmā vūpakaṭṭho viharati. Tassetaṃ bhikkhuno pāṭikaṅkhaṃ: sāmayikaṃ2 vā kantaṃ [PTS Page 111] [\q 111/] cetovimuttiṃ upasampajja viharissati, asāmayikaṃ3 vā akuppanti ṭhānametaṃ vijjati.

-------------------------
1.Sambodhisukhaṃ-syā,majasaṃ. 2.Sāmāyikaṃ-majasaṃ.
3.Asāmāyikaṃ-majasaṃ.

[BJT Page 274] [\x 274/]

Nāhaṃ ānanda, ekarūpampi samanupassāmi: yattha rattassa1 yatthābhirattassa2 rūpassa viparināmaññathābhāvā na uppajjeyyuṃ sokaparidevadukkhadomanassupāyāsā.

Ayaṃ kho ānanda, vihāro tathāgatena3 abhisambuddho, yadidaṃ sabbanimittānaṃ amanasikārā ajjhattaṃ suññataṃ upasampajja viharituṃ4 tatra ce ānanda, tathāgataṃ iminā vihārena viharantaṃ bhavanti upasaṅkamitāro bhikkhū bhikkhuniyo upāsakā upāsikāyo rājāno rājamahāmattā titthiyā titthiyasāvakā. Tatrānanda, tathāgato vivekaninneneva cittena vivekapoṇena vivekapabbhārena vūpakaṭṭhena nekkhammābhirattena byantībhutena sabbaso āsavaṭṭhāniyehi dhammehi aññadatthu uyyojanikapaṭisaṃyuttaṃyeva kathaṃ kattā hoti. Tasmātiha ānanda, bhikkhu cepi ākaṅkheyya: ajjhattaṃ suññataṃ upasampajja vihareyyanti. Tenānanda, bhikkhunā ajjhattameva cittaṃ saṇṭhapetabbaṃ, sannisādetabbaṃ, ekodi kātabbaṃ, samādahātabbaṃ

Kathañca ānanda, bhikkhu ajjhattameva cittaṃ saṇṭhapeti sannisādeti ekodiṃ karoti samādahati. Idhānanda, bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pitisukhaṃ paṭhamaṃ jhānaṃ upasampajja viharati, vitakkavicāranaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharati, sukhañca kāyena paṭisaṃvedeti. Yaṃ taṃ ariyā ācikkhanti: upekkhako satimā sukhavihārīti, catuttha jhānaṃ upasampajja viharati, sukhassa ca pahānā dukkhassa ca pahānā pubbeva somanassadomanassaṃ atthaṅgamā adukkhaṃ asukhaṃ upekkhāsatipārisuddhiṃ catutthaṃ jhānaṃ upasampajja viharati. Evaṃ kho ānanda, bhikkhu ajjhattameva cittaṃ saṇṭhapeti, sannisādeti, ekodi karoti, samādahati. [PTS Page 112] [\q 112/] so ajjhattaṃ suññataṃ manasikaroti. Tassa ajjhattaṃ suññataṃ manasikaroto suññatāya cittaṃ na pakkhandati, nappasīdati, na santiṭṭhati, vimuccati. Evaṃ santametaṃ ānanda, bhikkhu evaṃ pajānāti: ajjhattaṃ suññataṃ kho me manasikaroto ajjhattaṃ suññatāya cittaṃ na pakkhandati, nappasidati, na santiṭṭhati, na vimuccatī'ti. Itiha tattha sampajāno hoti. So bahiddhā suññataṃ manasikaroti. Tassa bahiddhā suññataṃ manasikaroto suññatāya cittaṃ na pakkhandati, nappasidati, na santiṭṭhati, na vimuccati. Evaṃ santametaṃ ānanda, bhikkhu evaṃ pajānāti: bahiddhā suññataṃ kho me manasikaroto bahiddhā suññatāya cittaṃ na pakkhandati, nappasidati, na santiṭṭhati, na vimuccatī'ti. Itiha tattha sampajāno hoti. So ajjhattabahiddhā suññataṃ manasikaroti. Tassa ajjhattabahiddhā suññataṃ manasikaroto suññatāya cittaṃ na pakkhandati, nappasidati, na santiṭṭhati, na vimuccati. Evaṃ santametaṃ ānanda, bhikkhu evaṃ pajānāti: ajjhattabahiddhā suññataṃ kho me manasikaroto ajjhattabahiddhā suññatāya cittaṃ na pakkhandati, nappasidati, na santiṭṭhati, na vimuccatī'ti. Itiha tattha sampajāno hoti.So āneñjaṃ manasikaroti.Tassa āneñjaṃ manasikaroto āneñjāya cittaṃ na pakkhandati, nappasīdati, na santiṭṭhati, na vimuccati. Evaṃ santametaṃ ānanda, bhikkhu evaṃ pajānāti: ānejjaṃ kho me manasikaroto āneñjāya cittaṃ na pakkhandati nappasīdati na santiṭṭhati na vimuccatī'ti. Itiha tattha sampajāno hoti.

Tenānanda, bhikkhunā tasmiṃyeva purimasmiṃ samādhinimittena ajjhattaṃ eva cittaṃ saṇṭhapetabbaṃ, sannisādetabbaṃ, ekodikātabbaṃ, samādahātabbaṃ. So ajjhattaṃ suññataṃ manasikaroti. Tassa ajjhattaṃ suññataṃ manasikaroto ajjhattaṃ suññatāya cittaṃ pakkhandati, pasīdati, santiṭṭhati, vimuccati. Evaṃ santametaṃ ānanda, bhikkhu evaṃ pajānāti: ajjhattaṃ suññataṃ kho me manasikaroto ajjhattaṃ suññatāya cittaṃ pakkhandati pasīdati santiṭṭhati vimuccatīti.

--------------------------
1.Ratassa-sīmu,majasaṃ,[PTS. 3.]Tattha tathāgatena-syā.
2.Yatthābhiratassa-sīmu,majasaṃ,[PTS. 4.]Viharati-syā.

[BJT Page 276] [\x 276/]

Itiha tattha sampajāno hoti. So bahiddhā suññataṃ masikaroti. Tassa bahiddhā suññataṃ manasikaroto suññatāya cittaṃ na pakkhandati, nappasīdati, na santiṭṭhati, na vimuccati. Evaṃ santametaṃ pajānāti: bahiddhā suññataṃ kho me manasikaroto bahiddhā suññatāya cittaṃ na pakkhanidati, nappasīdati, na santiṭṭhati, na vimuccatī'ti. Itiha tattha sampajāno hoti. So ajjhattabahiddhā suññataṃ masikaroti. Tassa ajjhattabahiddhā suññataṃ manasikaroto suññatāya cittaṃ na pakkhandati, nappasīdati, na santiṭṭhati, na vimuccati. Evaṃ santametaṃ pajānāti: ajjhattabahiddhā suññataṃ kho me manasikaroto ajjhattabahiddhā suññatāya cittaṃ na pakkhanidati, nappasīdati, na santiṭṭhati, na vimuccatī'ti. Itiha tattha sampajāno hoti. So āneñjaṃ manasikaroti. Tassa āneñjaṃ
Manasikaroto āneñjāya cittaṃ pakkhandati pasīdati santiṭṭhati vimuccati. Evaṃ santametaṃ ānanda, bhikkhu evaṃ pajānāti: āneñjaṃ kho me manasikaroto āneñjāya cittaṃ pakkhandati pasīdati santiṭṭhati vimuccatīti. Itiha tattha sampajāno hoti.

Tassa ce ānanda, bhikkhuno iminā vihārena viharato caṅkamāya cittaṃ namati. So caṅkamati evaṃ maṃ caṅkamantaṃ nābhijjhādomanassā pāpakā akusalā dhammā [PTS Page 113] [\q 113/] anvāssavissantīti. Itiha tattha sampajāno hoti. Tassa ce ānanda, bhikkhuno iminā vihārena viharato ṭhānāya cittaṃ namati. So tiṭṭhati: evaṃ maṃ tiṭṭhantaṃ1 nābhijjhā domanassā pāpakā akusalā dhammā anvāssavissantīti. Itiha tattha sampajāno hoti.
Tassa ce ānanda, bhikkhuno iminā vihārena viharato kathāya3 cittaṃ namati. So yāyaṃ kathā hīnā gammā pothujjanikā anariyā anatthasaṃhitā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Seyyathīdaṃ: rājakathā corakathā mahāmattakathā senākathā bhayakathā yuddhakathā annakathā pānakathā vatthakathā sayanakathā mālākathā gandhakathā ñātikathā yānakathā gāmakathā nigamakathā nagarakathā janapadakathā itthikathā purisakathā surākathā visikhākathā kumbhaṭṭhānakathā pubbapetakathā nānatthakathā lokakkhāyikā samuddakkhāyikā itibhavābhavakathā, iti vā iti evarūpiṃ kathaṃ na kathessāmiti. Itiha tattha sampajāno hoti. Yā ca kho ayaṃ ānanda, kathā abhisallekhikā cetovinīvaraṇasappāyā ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Seyyathīdaṃ: appicchakathā santuṭṭhikathā pavivekakathā, asaṃsaggakathā, viriyārambhakathā, sīlakathā, samādhikathā, paññākathā, vimuttikathā vimuttiñāṇadassanakathā, iti evarūpiṃ kathaṃ kathessāmīti. Itiha tattha sampajāno hoti.

-------------------------
1.Ṭhitaṃ-sīmu,majasaṃ,syā. 3.Bhāsāya-syā.
2.Nisinnaṃ-sīmu.

[BJT Page 278] [\x 278/]

Tassa ce ānanda, bhikkhuno iminā vihārena [PTS Page 114] [\q 114/] viharato vitakkāya cittaṃ namatī. So ye te vitakkā hīnā gammā pothujjanikā anariyā anatthasaṃhitā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattanti. Seyyathīdaṃ: kāmavitakko vyāpādavitakko vihiṃsāvitakko, iti evarūpe vitakke na1 vitakkessāmīti. Itiha tattha sampajāno hoti. Ye ca kho ime ānanda, vitakkā ariyā niyyānikā niyyanti. Takkarassa sammā dukkhakkhayāya. Seyyathīdaṃ: nekkhamma vitakko avyāpādavitakko avihiṃsāvitakko iti evarūpe vitakke vitakkessāmīti. Itiha tattha sampajāno hoti.

Pañca kho ime ānanda, kāmaguṇā. Katame pañca: cakkhu viññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddhā iṭṭhā kantā manāpā piyarūpā kāmūpasaṃhitā rajanīyā, ghānaviññeyyā gandhā iṭṭhā kantā manāpā piyarūpā kāmūpasaṃhitā rajanīyā, jivhāviññeyyā rasā iṭṭhā kantā manāpā piyarūpā kāmūpaṃhitā rajanīyā, kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā. Ime kho ānanda, pañcakāmaguṇā, yattha bhikkhunā abhikkhaṇaṃ sakaṃ cittaṃ paccavekkhitabbaṃ. Atthi nu kho me imesu pañcasu kāmaguṇesu aññatarasmiṃ vā aññatarasmiṃ vā āyatane uppajjati cetaso samudācāroti. Sace ānanda, bhikkhu paccavekkhamāno evaṃ pajānāti: atthi kho me imesu pañcasu kāmaguṇesu aññatarasmiṃ vā aññatarasmiṃ vā āyatane uppajjati cetaso samudācāroti. Evaṃ santametaṃ ānanda, bhikkhu evaṃ pajānāti: yo kho imesu pañcasu kāmaguṇesu chandarāgo, so me appahīnoti.2 Itiha tattha sampajāno hoti. Sace panānanda, bhikkhu paccavekkhamāno evaṃ pajānāti. Natthi kho me imesu pañcasu kāmaguṇesu aññatarasmiṃ vā aññatarasmiṃ vā āyatane uppajjati cetaso samudācāroti, evaṃ santametaṃ ānanda, bhikkhū evaṃ pajānāti: yo kho imesu pañcasu kāmaguṇesu chandarāgo, so me pahīnoti. Itiha tattha sampajāno hoti.

Pañca kho ime ānanda, upādānakkhandhā, yattha bhikkhunā udayabbayānupassinā vihātabbaṃ. Iti rūpaṃ iti rūpassa samudayo. Iti rūpassa atthaṅgamo. Iti vedanā [PTS Page 115] [\q 115/] iti vedanāya samudayo. Iti vedanāya atthaṅgamo, iti saññā iti saññāya samudayo, iti saññāya atthaṅgamo, iti saṅkhārā iti saṅkhārassa samudayo. Iti saṅkhārassa atthaṅgamo, iti viññāṇaṃ. Iti viññāṇassa samudayo, iti viññāṇassa atthaṅgamoti. Tassa imesu pañcasupādānakkhandhesu udayabbayānupassino viharato, yo pañcasupādānakkhandhesu asmimāno, so pahīyati. Evaṃ santametaṃ ānanda, bhikkhu evaṃ pajānāti: yo kho imesu pañcasupādānakkhandhesu asmimāno, so me pahīnoti. Itiha tattha sampajāno hoti. Ime kho te ānanda, dhammā ekantakusalāyatikā3 ariyā lokuttarā anavakkantā pāpimatā.

Taṃ kiṃ maññasi ānanda, kaṃ atthavasaṃ sampassamāno arahati sāvako satthāraṃ anubandhituṃ api panujjamānoti.

--------------------------
1.Evarūpena vitakkena-sīmu.Syā. 2.Nappahīṇo-sīmu.
3.Ekantakusalāyātikā-sīmu.

[BJT Page 280] [\x 280/]

Bhagavammūlakā no bhante, dhammā bhagavaṃnettikā bhagavampapaṭisaraṇā. Sādhu vata bhante, bhagavantaṃyeva paṭibhātu etassa bhāsitassa attho, bhagavato sutvā bhikkhū dhāressantītī.
Na kho ānanda, arahati sāvako satthāraṃ anubandhituṃ yadidaṃ suttaṃ geyyaṃ veyyākaraṇaṃ tassa hetu1 taṃ kissa hetu: dīgharattassa hi vo2 ānanda, dhammā sutā dhatā vacasā paricitā manasānupekkhitā diṭṭhiyā suppaṭividdhā. Yā ca kho ānanda, kathā abhisallekhikā ceto vinīvaraṇasappāyā ekantanibbidāya virāgāya nirodhāya upasamāya abhiññāya sambhodhāya nibbānāya saṃvattati. Seyyathīdaṃ: appicchakathā santuṭṭhikathā pavivekakathā asaṃsaggakathā viriyārambhakathā sīlakathā samādhikathā paññākathā vimuttikathā vimuttiñāṇadassanakathā. Evarūpiyā kho ānanda kathāya hetu arahati sāvako satthāraṃ anubandhituṃ api panujjamāno.

Evaṃ sante kho ānanda, ācariyūpaddavo hoti. Evaṃ sante antevāsūpaddavo hoti. Evaṃ sante brahmacārūpaddavo hoti.

Kathaṃ cānanda, ācariyūpaddavo hoti: idhānanda, ekacco satthā vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ [PTS Page 116] [\q 116/] vanapatthaṃ abbhokāsaṃ palālapuñjaṃ. Tassa tathā vūpakaṭṭhassa viharato anvāvaṭṭanti brāhamaṇagahapatikā negamā ceva jānapadā ca. So anvāvaṭṭantesu3 brāhmaṇagahapatikesu negamesu ceva jānapadesu ca mucchati, nikāyamati, gedhaṃ āpajjati, āvaṭṭati bāhullāya. Ayaṃ vuccatānanda, upaddavo ācariyo. Ācariyūpaddavena avadhiṃsu naṃ pāpakā akusalā dhammā saṃkilesikā ponobhavikā4 sadarā dukkhavipākā āyatiṃ jātijarāmaraṇiyā, evaṃ kho ānanda, ācariyūpaddavo hoti.

Kathaṃ cānanda, antevāsūpaddavo hoti. Tasseva kho panānanda, satthu sāvako tassa satthu vivekamanubrūhayamāno vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ, tassa tathā vūpakaṭṭhassa viharato anvāvaṭṭanti brāhmaṇagahapatikā negamā ceva jānapadā ca. Yo anvāvaṭṭantesu brāhmaṇagahapatikesu negamesu ceva jānapadesu ca mucchati, nikāyamati, gedhaṃ āpajjati, āvaṭṭati bāhullāya. Ayaṃ vuccatānanda, upaddavo antevāsī. Antevāsupaddavena avadhiṃsu naṃ pāpakā akusalā dhammā saṅkilesikā ponobhavikā sadarā dukkhavipākā āyatiṃ jātijarāmaraṇiyā. Evaṃ kho ānanda, antevāsūpaddavo hoti.

---------------------------
1.Suttageyyaveyyākaraṇassa sotuṃ-syā.
Suttaṃ geyyaṃ veyyākaraṇassa hetu-[PTS.]
2.Te-sīmu,majasaṃ.
3.Anvāvattantesu-sīmu,majasaṃ.
Anvāvaṭṭesu-syā,[PTS.]
4.Ponobbhavikā-majasaṃ. 5.Kāmayati-[PTS.]

[BJT Page 282] [\x 282/]

Kathaṃ cānanda, brahmacārūpaddavo hoti: idhānanda tathāgato loke upapajjati arahaṃ sammāsambuddho vijjācaraṇasampanno sugato lokavidu anuttaro purisadammasārathī satthā devamanussānaṃ buddho bhagavā. So vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ, tassa tathā vūpakaṭṭhassa viharato anvāvaṭṭanti brāhmaṇagahapatikā negamā ceva jānapadā ca. So anvāvaṭṭantesu brāhmaṇagahapatikesu negamesu ceva jānapadesu ca na mucchati, na nikāmayati, na gedhaṃ āpajjati. [PTS Page 117] [\q 117/] na āvaṭṭati bāhullāya. Tasse kho panānanda, satthu sāvako tassa satthu vivekamanubrūhayamāno vivittaṃ senāsanaṃ bhajati āraññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ, tassa tathā vūpakaṭṭhassa viharato anvāvaṭṭanti brāhmaṇagahapatikā negamā ceva jānapadā ca. So anvāvaṭṭantesu brāhmaṇagahapatikesu negamesu ceva jānapadesu ca mucchati, nikāmayati, gedhaṃ āpajjati. Āvaṭṭati bāhullāya. Ayaṃ vuccatānanda, upaddavo brahmacārī brahmacārūpaddavena avadhiṃsu naṃ pāpakā akusalā dhammā saṅkilesikā ponobhavikā sadarā dukkhavipākā āyatiṃ jātijarāmaraṇiyā. Evaṃ kho ānanda, brahmacārūpaddavo hoti.

Tatrānanda, yo cevāyaṃ ācariyūpaddavo yo ca antevāsūpaddavo, ayaṃ tehi brahmacārūpaddavo dukkhavipākataro ceva kaṭukavipākataroca, api ca vinipātāya saṃvattati.

Tasmātiha maṃ ānanda, mittavatāya samudācaratha, mā sapattavatāya. Taṃ vo bhavissati dīgharattaṃ hitāya sukhāya.

Kathaṃ cānanda, satthāraṃ sāvakā sapattavatāya samudācaranti no mittavatāya: idhānanda, satthā sāvakānaṃ dhammaṃ deseti anukampako hitesī anukampaṃ upādāya idaṃ vo hitāya idaṃ vo sukhāyāti. Tassa sāvakā na sussūsanti, na sotaṃ odahanti na aññā cittaṃ upaṭṭhapenti. Vokkamma ca satthusāsanā vattanti. Evaṃ kho ānanda satthāraṃ sāvakā sapattavatāya samudācaranti no mittavatāya.

Kathañcānanda, satthāraṃ sāvakā mittavatāya samudācaranti no sapattavatāya: idhānanda, satthā sāvakānaṃ dhammaṃ deseti anukampako hitesī anukampaṃ upādāya: idaṃ vo hitāya idaṃ vo sukhāyāti. Tassa sāvakā sussūsanti, sotaṃ odahanti, aññā cittaṃ1 upaṭṭhapenti, na ca vokkamma satthusāsanā2 vattanti. Evaṃ kho ānanda, satthāraṃ

---------------------------
1.Aññaṃ cittaṃ-[PTS. 2.]Sāsanaṃ-syā.

[BJT Page 284] [\x 284/]

Sāvakā mittavatāya samudācaranti no sapattavatāya. Tasmātīha [PTS Page 118] [\q 118/] maṃ ānanda, mittavatāya samudācaratha, mā sapattavatāya taṃ vo bhavissati dīgharattaṃ hitāya sukhāya. Na kho ahaṃ ānanda, tathā parakkamissāmi. Yathā kumbhakāro āmake āmakamatte. Niggayha niggayhāhaṃ ānanda vakkhāmi. Pavayha ānanda pavayha vakkhāmi. Yo sāro so ṭhassatīti.

Idamavoca bhagavā attamano āyasmā ānando bhagavato bhāsitaṃ abhinandīti.

Mahāsuññata suttaṃ dutiyaṃ

[BJT Page 286] [\x 286/]